Հոդված 29. Մրցութային միջոցների կազմի մեջ մտած գույքի իրացումը
Հոդված 29. Մրցութային միջոցների կազմի մեջ մտած գույքի իրացումը
1. Մրցութային միջոցների կազմի մեջ մտած գույքի իրացման մասին և դրա իրացման ժամկետների մասին որոշումն ընդունում է դատարանը` պարտապանի վերակազմավորման և լուծարման նախագծերի հիման վրա` մրցութային կառավարչի ներկայացմամբ և պարտատերերի ժողովի (կոմիտեի) համաձայնությամբ:
2. Մրցութային միջոցների կազմի մեջ մտած գույքի իրացման և դրա ժամկետների մասին որոշումն ընդունելուց հետո մեկ շաբաթվա ընթացքում դատարանը, Հայաստանի Հանրապետության օրենսդրությամբ սահմանված կարգով, հրապարակում է այն` նշելով դրա վերաբերյալ առաջարկության ներկայացման կարգը և ժամկետները:
3. Իրավաբանական անձի կարգավիճակ չունեցող պարտապանի մրցութային միջոցների կազմի մեջ մտած գույքը իրացվում է միայն աճուրդով:
4. Իրավաբանական անձի կարգավիճակ ունեցող պարտապանի մրցութային միջոցների կազմի մեջ մտած գույքի իրացման ձևը սահմանվում է դատարանի կողմից` մրցութային կառավարչի ներկայացմամբ` պարտատերերի ժողովի (կոմիտեի) համաձայնությամբ:
Մեկ առաջարկության առկայության դեպքում պարտապանի մրցութային միջոցների կազմի մեջ մտած գույքն իրացվում է դատարանի որոշմամբ` աճուրդի, մրցույթի կամ ուղղակի գործարքի միջոցով:
Մեկից ավելի առաջարկության առկայության դեպքում պարտապանի մրցութային միջոցների կազմի մեջ մտած գույքն իրացվում է դատարանի որոշմամբ` աճուրդի կամ մրցույթի միջոցով:
Եթե առաջարկներ ներկայացնելու ժամկետում մրցութային կառավարիչը չի ներկայացնում իրացման ձևի մասին համաձայնեցված առաջարկություն, կամ դատարանը համաձայն չէ մրցութային կառավարչի կողմից ներկայացված առաջարկության հետ, ապա դատարանը իրավասու է ընդունել վերջինիս հետ չհամաձայնեցված որոշում` ներկայացնելու ժամկետը լրանալու պահից սկսած երկու շաբաթվա ընթացքում:
Նշված երկու դեպքերում դատարանը, առանց մրցութային կառավարչի հետ համաձայնեցնելու, կարող է ընտրել պարտապանի մրցութային միջոցների մեջ մտած գույքի իրացման միայն աճուրդի ձևը, բացառությամբ այն դեպքերի, երբ Հայաստանի Հանրապետության օրենսդրությամբ սահմանափակումներ են նախատեսված մրցութային միջոցների կազմի մեջ մտած գույքի հետագա օգտագործման վերաբերյալ: Այդ դեպքում դատարանը կարող է ընտրել իրացման միայն մրցութային ձևը:
Իրավաբանական անձի կարգավիճակ ունեցող պարտապանի մրցութային միջոցների կազմի մեջ մտած գույքն ուղղակի գործարքի ձևով իրացնելու մասին որոշումն ընդունվում է դատարանի կողմից այն դեպքում, եթե դատարանը, պարտատերերի ժողովը (կոմիտեն) և մրցութային կառավարիչը համաձայն են, որ ուղղակի գործարքի արդյունքում ստացված դրամական միջոցների ծավալը լինի ոչ պակաս, քան աճուրդի ձևով իրացումից ստացվածը: