Հոդված 73. Կարգապահական տույժ կիրառելու որոշումը բողոքարկելը

Հոդված 73. Կարգապահական տույժ կիրառելու որոշումը բողոքարկելը

(վերնագիրը խմբ. 02.10.25 ՀՕ-320-Ն)

1. Փրկարարական ծառայողն իր նկատմամբ կարգապահական տույժ կիրառելու մասին որոշումը կարող է բողոքարկել Փրկարար ծառայության տնօրենին, իսկ Փրկարար ծառայության տնօրենի կողմից տույժ կիրառվելու դեպքում՝ լիազոր մարմնի ղեկավարին՝ կարգապահական տույժ կիրառելու մասին որոշմանը ծանուցվելու օրվանից հաշված` հինգ աշխատանքային օրվա ընթացքում:

2. Սույն հոդվածի 1-ին մասով սահմանված կարգով բողոք բերելը կասեցնում է բողոքարկվող ակտի կատարումը:

3. Բողոքը պետք է պարունակի՝

1) բողոք բերող փրկարարական ծառայողի անունը, ազգանունը, պաշտոնը.

2) բողոքարկվող որոշումը.

3) բողոքի առարկան և հիմնավորումները.

4) բողոքի պահանջը.

5) առկայության դեպքում՝ բողոքին կից ներկայացվող նյութերի ցանկը.

6) բողոքը ներկայացնելու տարին, ամիսը, ամսաթիվը.

7) բողոք բերողի ստորագրությունը։

4․ Սույն հոդվածի 1-ին մասով սահմանված բողոքարկման կարգը չի տարածվում փրկարարական ծառայողի վարքագծի կանոնները, «Փրկարար ծառայության մասին» կամ «Հանրային ծառայության մասին» Հայաստանի Հանրապետության օրենքներով նախատեսված անհամատեղելիության պահանջները, այլ սահմանափակումներ և շահերի բախման կանոնները խախտելու դեպքերում կիրառված կարգապահական տույժերի վրա, որոնք կարող են բողոքարկվել դատական կարգով։

5․ Քննարկելով բերված բողոքը` իրավասու պաշտոնատար անձն իրավասու է՝

1) բավարարելու բողոքն ամբողջությամբ կամ մասնակիորեն և փոփոխելու կարգապահական տույժի տեսակը կամ կարգապահական տույժ կիրառելու մասին որոշումն անվավեր ճանաչելու.

2) մերժելու բողոքը՝ կարգապահական տույժ կիրառելու մասին որոշումը թողնելով անփոփոխ։

(73-րդ հոդվածը խմբ. 02.10.25 ՀՕ-320-Ն)

(02.10.25 ՀՕ-320-Ն օրենքն ունի անցումային դրույթ)