Հոդված 85.3. Փրկարարական ծառայողի էթիկայի հանձնաժողովի լիազորությունները
Հոդված 85.3. Փրկարարական ծառայողի էթիկայի հանձնաժողովի լիազորությունները
1. Հանձնաժողովը՝
1) քննում է փրկարարական ծառայողի (բացառությամբ Փրկարար ծառայության տնօրենի և Փրկարար ծառայության տնօրենի տեղակալների) վարքագծի կանոնների, անհամատեղելիության պահանջների, այլ սահմանափակումների և շահերի բախման վերաբերյալ ենթադրյալ խախտումները.
2) հանրային ծառայողի անհամատեղելիության պահանջների, այլ սահմանափակումների, փրկարարական ծառայողի վարքագծի կանոնների խախտումների, ինչպես նաև շահերի բախման իրավիճակների կանխարգելմանն ու վերացմանն ուղղված առաջարկություններ է ներկայացնում համապատասխան պաշտոնատար անձին:
2. Հանձնաժողովն իրավասու է՝
1) անցկացնելու լսումներ.
2) դիմողից, ենթադրյալ խախտումը կատարած փրկարարական ծառայողներից, այլ անձանցից, պետական և տեղական ինքնակառավարման մարմիններից, կազմակերպություններից հայցելու և ստանալու քննությանն առնչվող ցանկացած նյութ, փաստաթուղթ կամ տեղեկություն.
3) քննության շրջանակներում փաստաթղթաշրջանառության ապահովման հետ կապված միջնորդություններ ներկայացնելու իրավասու ստորաբաժանում։
3. Քննության արդյունքով Հանձնաժողովն ընդունում է խախտման առկայության կամ բացակայության վերաբերյալ եզրակացություն, որն ստորագրում են Հանձնաժողովի անդամները։ Խախտման առկայության վերաբերյալ եզրակացությունը ներառում է փրկարարական ծառայողին կարգապահական տույժի ենթարկելու մասին առաջարկություն: Հանձնաժողովը կարող է լիազոր մարմնի ղեկավարին ներկայացնել բարեվարքության վիճակի բարելավմանն ուղղված առաջարկություններ։
4. Հանձնաժողովն անհամատեղելիության պահանջների և այլ սահմանափակումների, ինչպես նաև վարքագծի սկզբունքների և դրանցից բխող վարքագծի կանոնների վերաբերյալ մասնագիտական խորհրդատվություն և մեթոդական աջակցություն ստանալու համար կարող է դիմել Կոռուպցիայի կանխարգելման հանձնաժողով:
5. Եթե ծառայողական քննությունը նշանակվել է փրկարարական ծառայողի վարքագծի կանոնների կամ անհամատեղելիության պահանջների կամ այլ սահմանափակումների կամ շահերի բախման կանոնների հետ կապված խախտումները քննելու համար, և ծառայողական քննության ընթացքում պարզվում է, որ խախտումը կարգապահական է կամ վերաբերում է ծառայողական լիազորությունները կամ դրանցով պայմանավորված ազդեցությունը չարաշահելուն կամ ծառայողական լիազորություններն անցնելուն, ապա Հանձնաժողովը միջնորդություն է ներկայացնում ծառայողական քննություն նշանակելու իրավասություն ունեցող պաշտոնատար անձին՝ սույն օրենքով սահմանված կարգով հետագա ընթացքն ապահովելու համար:
6. Հանձնաժողովի կողմից սույն հոդվածի 1-ին մասի 1-ին կետով նախատեսված խախտումների կապակցությամբ ծառայողական քննության նկատմամբ վերաբերելի մասով (mutatis mutandis) կիրառվում են սույն օրենքի 8․2-8․7-րդ գլուխների կարգավորումները: