Հոդված 138.11. Կուսակցության թեկնածուների ընտրական ցուցակի կամ դրանում ներառված թեկնածուի գրանցումն անվավեր ճանաչելը

Հոդված 138.11. Կուսակցության թեկնածուների ընտրական ցուցակի կամ դրանում ներառված թեկնածուի գրանցումն անվավեր ճանաչելը

1. Կենտրոնական ընտրական հանձնաժողովը կուսակցության թեկնածուների ընտրական ցուցակի գրանցումը ճանաչում է անվավեր, եթե գրանցումից հետո հայտնի են դառնում փաստեր, որոնց ուժով՝

1) կուսակցության ընտրական ցուցակում ընդգրկված թեկնածուների վրա տարածվում են սույն օրենսգրքով նախատեսված սահմանափակումները.

2) գրանցման համար ներկայացված փաստաթղթերը թերի են կամ կեղծված են:

Կուսակցությունների դաշինքի թեկնածուների ընտրական ցուցակի գրանցումը համարվում է անվավեր, եթե դաշինքում մնացել է մեկ կուսակցություն:

2. Կուսակցության՝ ընտրական ցուցակում ընդգրկված թեկնածուի գրանցումը համարվում է անվավեր, եթե գրանցումից հետո հայտնի են դառնում փաստեր, որոնց ուժով՝

1) նրա վրա տարածվում են սույն օրենսգրքով նախատեսված սահմանափակումները.

2) գրանցման համար նրա վերաբերյալ ներկայացված փաստաթղթերը թերի են կամ կեղծված են:

3. Նման դեպքերում թեկնածուն հանվում է ցուցակից։

4. Կուսակցության ընտրական ցուցակի կամ դրանում ընդգրկված թեկնածուի գրանցումն անվավեր է ճանաչվում կենտրոնական ընտրական հանձնաժողովի անդամների ընդհանուր թվի առնվազն երկու երրորդով ընդունված որոշմամբ, բացառությամբ սույն հոդվածի 1-ին կետի վերջին մասով սահմանված դեպքի։

5. Կուսակցության ընտրական ցուցակի կամ դրանում ներառված թեկնածուի գրանցումը մերժելու կամ անվավեր ճանաչելու մասին կենտրոնական ընտրական հանձնաժողովի որոշումը կարող է բողոքարկվել Հայաստանի Հանրապետության վարչական դատավարության օրենսգրքով սահմանված կարգով և ժամկետներում:

(138.11-րդ հոդվածը լրաց. 26.12.08 ՀՕ-6-Ն)