Հոդված 175. Պարտատերերի պահանջների ներկայացումը

Հոդված 175. Պարտատերերի պահանջների ներկայացումը

1. Պարտապանին սնանկ ճանաչելու մասին հայտարարությունը Հայաստանի Հանրապետության հրապարակային ծանուցումների պաշտոնական ինտերնետային կայքում հրապարակվելու օրվանից մեկամսյա ժամկետում պարտատերերն իրենց պահանջները ներկայացնում են Սնանկության դատարան և կառավարչին։

2․ Պահանջում պետք է նշվեն՝

1) սնանկության գործի համարը, պարտապան իրավաբանական անձի դեպքում՝ անվանումը, գտնվելու վայրը, հարկ վճարողի հաշվառման համարը, առկայության դեպքում՝ այլ տեղեկություններ, ֆիզիկական անձի դեպքում` անունը, ազգանունը, բնակության վայրը, առկայության դեպքում՝ այլ տեղեկություններ․

2) պահանջ ներկայացնողի էլեկտրոնային փոստի հասցեն, ծանուցման հասցեն, բանկային դրամային հաշվեհամարը, որին պետք է փոխանցվեն իրենց պահանջների մարմանն ուղղված դրամական միջոցները, եթե պարտատերը իրավաբանական անձ է՝ նաև անվանումը, գտնվելու վայրը, հարկ վճարողի հաշվառման համարը, առկայության դեպքում՝ այլ տեղեկություններ, եթե ֆիզիկական անձ է՝ նաև անունը, ազգանունը, բնակության վայրը, առկայության դեպքում՝ այլ տեղեկություններ․

3) պահանջի առաջացման փաստական և իրավական հիմքերը․

4) պահանջին առնչվող երրորդ անձ գրավատուների, այդ թվում՝ գրավի առարկայի գրավադրման ժամանակ համաձայնություն տված անձանց, երաշխավորների և երաշխիք տված անձանց, այլ շահագրգիռ անձանց տվյալները (եթե իրավաբանական անձ է՝ անվանումը, գտնվելու վայրը, հարկ վճարողի հաշվառման համարը, առկայության դեպքում՝ այլ տեղեկություններ, եթե ֆիզիկական անձ է՝ անունը, ազգանունը, բնակության վայրը, առկայության դեպքում՝ այլ տեղեկություններ)․

5) գումարային պահանջի դեպքում պահանջի չափը՝ առանձին նշելով հիմնական պարտքի, վնասների, տուժանքի (տուգանքի, տույժի) չափերը` համապատասխան հաշվարկներով․

6) սույն օրենսգրքով սահմանված դեպքերում ոչ գումարային պահանջ ներկայացնելու հնարավորության դեպքում՝ ոչ գումարային պահանջի նկարագիրը․

7) ապահովված պահանջի դեպքում՝ միջնորդություն պահանջն ապահովված դիտարկելու վերաբերյալ, չապահովված պահանջի դեպքում՝ միջնորդություն պահանջը սույն օրենսգրքի 174-րդ հոդվածին համապատասխան հերթում դիտարկելու վերաբերյալ․

8) պահանջին կից ներկայացվող փաստաթղթերի ցանկը։

3․ Պահանջին կից ներկայացվում են՝

1) պահանջը հիմնավորող փաստաթղթերը․

2) պահանջի մեկ օրինակը կառավարչին ուղարկելու վերաբերյալ ապացույցը, եթե պահանջը ներկայացվում է ոչ էլեկտրոնային հարթակի միջոցով։

4․ Եթե պարտատիրոջ պահանջն ապահովված է գրավով, երաշխավորությամբ կամ երաշխիքով, և պարտատիրոջ կողմից Սնանկության դատարան ներկայացված պահանջը չի պարունակում ապահովված պահանջին առնչվող փաստական և իրավական հիմքերը, ինչպես նաև պահանջը՝ որպես ապահովված դիտարկելու վերաբերյալ միջնորդություն, ապա պահանջը կարող է գրանցվել միայն որպես չապահովված։ Սույն մասում նշված պահանջը հաստատված համարվելուց հետո դադարում են այդ պահանջի մասով գրավատուների, երաշխավորների և երաշխիք տված անձանց նկատմամբ պահանջ ներկայացնելու պարտատիրոջ իրավունքները։