Հոդված 133. ՀԱՆՁՆԱԺՈՂՈՎԻ ՀԱՇՎԵՏՎԱԿԱՆ ՎԵՐԱՀՍԿՈՂՈՒԹՅԱՆ ԻՐԱՎԱՍՈՒԹՅՈՒՆԸ
Հոդված 133. ՀԱՆՁՆԱԺՈՂՈՎԻ ՀԱՇՎԵՏՎԱԿԱՆ ՎԵՐԱՀՍԿՈՂՈՒԹՅԱՆ ԻՐԱՎԱՍՈՒԹՅՈՒՆԸ
1. Հաշվետվական վերահսկողություն իրականացնելու նպատակով Հանձնաժողովն իրավունք ունի որոշել սույն օրենքով և իր որոշմամբ նախատեսված հաշվետվությունների, տեղեկանքների, բացատրագրերի և նման այլ փաստաթղթերի ներկայացման կարգն ու ժամկետները: Սույն կետով նախատեսված փաստաթղթերի համար կարող է սահմանվել ներկայացման էլեկտրոնային եղանակ:
2. Հաշվետվությունները, տեղեկանքները, բացատրությունները և նման այլ փաստաթղթերը Հանձնաժողովի կողմից սահմանված կարգով մատչելի են դարձվում հասարակության համար, եթե սույն օրենքով այլ բան սահմանված չէ: Հանձնաժողովն իրավասու է սույն կանոնից բացառություններ սահմանել, եթե գտնում է, որ այդ փաստաթղթերի հրապարակայնությունը կարող է վտանգել ներդրողների օրինական շահերը կամ հանգեցնել պետական, բանկային կամ առևտրային գաղտնիքի բացահայտմանը:
3. Մասնագիտացված անձի կամ թողարկողի կողմից սույն հոդվածի 1-ին կետով նախատեսված փաստաթղթերը չներկայացնելու, ուշացումով, սահմանված կարգի էական այլ խախտումներով կամ ոչ լիարժեք փաստաթղթեր ներկայացնելու դեպքում Հանձնաժողովը տալիս է նախազգուշացում և կարգադրում` ուղղել և հետագայում բացառել նման խախտումը:
Ցանկացած 360 օրվա ընթացքում երկուսից ավելի խախտում չարամտությամբ կամ ակնհայտ անտարբերությամբ թույլ տալու դեպքում Հանձնաժողովն իրավունք ունի նշանակել տուգանք` նվազագույն աշխատավարձի հազարապատիկի չափով:
Անկախ սույն կետով սահմանված որևէ տույժի կիրառումից` Հանձնաժողովը փաստաթղթի ուշացման յուրաքանչյուր օրվա համար մասնագիտացված անձի կամ թողարկողի նկատմամբ նշանակում է տուգանք` նվազագույն աշխատավարձի տասնապատիկի չափով` սկսած ուշացման երրորդ օրվանից:
Սույն կետով նախատեսված դեպքերում Հանձնաժողովն իրավունք ունի նաև որակավորումից զրկել և մինչև երկու տարի որակավորման չթույլատրել մասնագիտացված անձի տնօրենին ու փոխտնօրեններին (անկախ նրանց մեղքից), ինչպես նաև դրա այն ղեկավարներին, որոնք մեղավոր են տվյալ խախտման համար:
4. Սույն հոդվածի 3-րդ կետում թվարկված և դրանց կապակցությամբ թույլ տրված այլ խախտումների համար մասնագիտացված անձի կամ թողարկողի ղեկավարներն ու ծառայողները օրենքով սահմանված կարգով ենթարկվում են վարչական կամ քրեական պատասխանատվության: