Հոդված 86. ԳՈՒՅՔԻ ՀԱՓՇՏԱԿՈՒՄԸ ԳՈՂՈՒԹՅԱՆ ՄԻՋՈՑՈՎ

Հոդված 86. ԳՈՒՅՔԻ ՀԱՓՇՏԱԿՈՒՄԸ ԳՈՂՈՒԹՅԱՆ ՄԻՋՈՑՈՎ

Գույքի գաղտնի հափշտակումը (գողություն)`

պատժվում է ազատազրկմամբ մինչև երկու տարի ժամանակով, կամ տուգանքով սահմանված նվազագույն աշխատավարձի երեսնապատիկից մինչև հիսնապատիկի չափով:

Գողությունը, որ կատարվել է շինություն, պահեստարան կամ բնակարան մուտք գործելով կամ կրկին անգամ կամ մի խումբ անձանց կողմից նախապես համաձայնության գալով`

պատժվում է ազատազրկմամբ երկուսից մինչև վեց տարի ժամանակով:

Գողությունը, որ կատարվել է խոշոր չափերով`

պատժվում է ազատազրկմամբ երեքից մինչև ութ տարի ժամանակով` անձնական գույքի բռնագրավմամբ կամ առանց բռնագրավման:

Գողությունը, որ կատարվել է առանձնապես վտանգավոր ռեցիդիվիստի կողմից կամ առանձնապես խոշոր չափերով`

պատժվում է ազատազրկմամբ վեցից մինչև տասը տարի ժամանակով` անձնական գույքի բռնագրավմամբ:

Ծանոթագրություն. սույն գլխի 86-90 և 92 հոդվածներում նախատեսված գույքի հափշտակության չափերն են`

1) մանր` հանցագործության կատարման պահին Հայաստանի Հանրապետությունում սահմանված նվազագույն աշխատավարձի երեսնապատիկի չափը չգերազանցող գումարը (արժեքը).

2) զգալի (Հայաստանի Հանրապետության քրեական օրենսգրքի 86, 87, 89 և 90 հոդվածների առաջին մասերով նախատեսված հափշտակություններ)` հանցագործության կատարման պահին Հայաստանի Հանրապետությունում սահմանված նվազագույն աշխատավարձի երեսնապատիկից մինչև երկուհազարապատիկի չափը չգերազանցող գումարը (արժեքը).

3) խոշոր` հանցագործության կատարման պահին Հայաստանի Հանրապետությունում սահմանված նվազագույն աշխատավարձի երկուհազարապատիկից մինչև վեցհազարապատիկի չափը չգերազանցող գումարը (արժեքը).

4) առանձնապես խոշոր` հանցագործության կատարման պահին Հայաստանի Հանրապետությունում սահմանված նվազագույն աշխատավարձի վեցհազարապատիկի չափը գերազանցող գումարը (արժեքը):

(Հայկական ՍՍՀ Գերագույն սովետի նախագահության 1982 թ. դեկտեմբերի 29-ի հրամանագրի խմբագրությամբ - ՀՍՍՀԳՍՏ, 1982 թ., N 24, հոդվ. 287, 11.05.92, 09.06.97, 19.06.98 թիվ ՀՕ-231, 07.03.01 ՀՕ-156 օրենքներ)